إحتياجات المولود الجديد ....الجزء الأول

طبعا النت مليان موضوعات عن إحتياجات المولود الجديد بالصور والمقارنات 

لكن هحاول اجمعهم فى نقاط واذكر الاساسيات  واهم الملاحظات عند الشراء
وايه ممكن الاستغناء عنه وايه ممكن استخدام بديل اوفر له 

إحتياجات الطفل هتكون عبارة عن : 

(ملابس -   ملحقات الملابس او المفروشات   - أدوات عناية ومستحضرات - أثاث وتجهيز أماكن لمستلزماته )

1- الملابـــــــــــــــــــــــــــــــــــــــــــــــــــس

 (داخلية - خارجيه (بيت وخروج) _ مكملات)

النصائح العامة :
 1- مراعاة خامة الملابس وخصوصا الداخلية تكون قطن حتى لا تتسبب في حساسية للطفل
2- عدم شراء ملابس كثير مقاس 0-3 لانه هيلبسها شهرين ويمكن قبل ما يكمل الشهر الثالت تكون صغرت عليه ولنفس السبب بلاش تكون غالية أوى لإنه مش هيلحق يلبسها كثير .
3- مراعاة فصل الولادة صيف , شتاء ... فمش اى حاجة تعجبك تشتريها لإن عقبال ما يجى الفصل الى بعده يكون كبر 

4- مفيش عدد محدد لقطع الملابس حسب إمكانياتك وحسب فصل الولادة (فى الشتاء القطع بيكون عددها أكثر نظرا لإن المولود بيلبس أكثر من قطعة ونظرا لإن الغسيل بيتأخر نوعا حتى يجف )

* الملابس الداخلية : علوى : فانلات: كت - نص - بكم ....سواء عادى أو بكباسين من تحت 
فى الصيف مش هتحتاجى الى بكم وفى الشتاء بتجيبى الثلاثة او النص والى بكم بس

               سفلي: لفف (بيستخدمها قبل وقوع السرة ) - بنطلونات 

(أهم الملاحظات :* تكون قطن *فتحه الرأس واسعة أو بتتفتح بكباسين والأفضل الى بتتقفل على بعض(الشايات ) *يفضل الفانلات تكون بكباسين من تحت عشان هدومه متتحركش كل ما تشيليه * يفضل البنطلونات باستيك من تحت عشان لو كبير شوية متبقاش رجله مختفيه فى البنطلون وتضايقه )

* الملابس الخارجية :(جلاليب -
سالبوتات_بيجامات أو فساتين حسب النوع )

اشترى 3 للخروج مثلا - و6 للبيت أو حسب إحتياجاتك 

(أهم الملاحظات :*  الجلاليب بتبقى أفضل فى أول أيام الولادة واسهل فى الغيار

* فى أى حاجة اتأكدي من فتحة الراس ويفضل تكون بتتوسع بكباسين 

 _* السالوبيتات تاخدى بالك ان الازرار او الكباسين تكون ممتدة بطول السالوبت كلهايعنى لحد رجل البيبى تحت عشان تبقى سهلة ساعة تغيير الحفاضو بلاش اللى بتبقى الزراير فيها لحد البطن بس  اللى ازرارها من ورا * يفضل الى رجلها مقفولة عشان متحتاجيش شراب )

*مكملات   (شرابات - جوانيات -طواقي -بفاتات )

االبفاتات أساسية لكن الباقى هتحتاجيه فى الشتاء
( وممكن فى الصيف تشترى جوانتى او اتنين قطن بيستخدموا عشان الطفل ميخربش نفسه لو مش عارفة تقصى ظوافره )

(أهم الملاحظات : *يفضل تكون قطن بس مغلفة من الداخل بمشمع عشان تمنع البلل انه يوصل للبيبى * فى منها انواع الى برباط عند الرقبة بس  (مشكلته بيتحرك والرباط ممكن يأذى الرقبة )والى برباط عند الرقبة والبطن (اكثر ثبات لكن نفس مشكلة الرباط ) فأفضلهم اللى هو بكبسون او كاوتش او زرار و ده بيحل مشكلة رباط الرقبة عشان كده هو اكثر أمان)

================================

2- ملحقات الملابس (المفروشات)

* كوفرته بغطاء رأس ...أساسي
 حتى فى الشتاء بتكون تحت البطانية لتجنب الحساسية  

* بطانية  ...لو فى الشتاء أساسي 

* فوط ( للاستحمام - فوط للكشط - فوط للتنشيف بعد الغيار )
- لو مش هتشتريها تحضريها من فوط عندك مع مراعاة ان ملمسها يكون ناعم

*شنطة بيبى :لوضع أدواته وملابسه فيها عند الخروج 
- لو مش هتشتريها تحضري شنطة خروج كبيرة يكون فيها جيوب كثيروممكن تعملى منظم للشنطة لتقسيمها هتلاقوا الطريقة على النت بالبحث عن
 (عمل منظم لشنطة البيبى )

*(بورت - كيس نوم _ كاريكوت - شيالة للطفل ) ......حسب الرغبة 

- شيالة الطفل هتحتاجيها لو بتخرجى كثير لوحدك وهتضطرى لحمل الطفل

- الكاريكوت ناس كثير بتقول مش عملى ومشكلته انه ثقيل واستخدامه بيقتصر على أول 3-4 شهور بالكثير  وفى ناس بتستخدمه كسرير فى الفترة دى وده شكله 

- البورت : حلو فى الشتاء ويغني عن كيس النوم وملوش لازمه فى الصيف
هدفه  سهولة حمل الطفل وتدفيته واخره بردو أول كام شهر  وده شكله